يا اهل القصيم مين قدكم

قالت قصيمي قلت فخر ومعزه ****** أهل الكرم والعلم والحلم والباس

قالت قصيمي قصدها بي تهزه ****** ماتدري اني بفتخر وارفــع الراس

الحمـــــدلله روسنا دوم رزه ****** اللي خلقنا بس نحني له الراس

صافي نسبنا والحسب فيه عزه ****** أصل أصيل وفصل والعرق دساس

أهل الوفاء والدين صافي منزه ****** عن كل ماشاب العقيده من أدلاس

حنا العقيلات انشدي رجال غزه ****** حنا هل الدنيا وللدين حـــراس

حنا سنايد نجد في كل حــــزه ****** لا خانت حلوق الرجاجيل الأنفاس

حنا اجبال يعجز الريـــح هـــــزه ****** حنا لنجد حزام وعصابة الـراس

نارد حياض المرجـــــلات ونلــزه ****** مانمشي دروب الرذيله والأدناس

من يغلط لسانه علينــا نجــــزه ****** واللي يحقر قدر الرجاجيل ينداس

منا العدو تكفيه بالعين خـزه ****** يقضي عليه الخوف مع كل هوجاس

من ذكرنا في قلبه تثور نــزه****** من طاري القصمان يبلاه وسواس

نومه كوابيس وروعه وفــــزه ****** دقت نواقيس الخطر له والأجراس

وان هو لقي له من علينا يــوزه ****** هون له الصعبات وابليس خنــاس

مايدري انه للمهالـــــك يــــدزه ****** عجل علي مبناه يمحي من الساس

يابنت حنا من نخانا نعـــــزه ****** يأمن بنا الملهوف وتهابنـــا الناس

مرسولنا للخير دايــم نكـــزه ****** ولصرخة المحتاج نرخي الأكياس

تاريخنا مجـــــد لبسناه بـزه ****** نمشي بوسط السوق ماندحم الساس

لك ماتركنا بكاس الأمجاد مـزه ****** واجد عليك ومثلك حثالة الكاس

وش جاب حر الطير لفريـخ وزه ****** منهو يساوي جوهر الماس بنحاس

لاتحسبين انك لنا مــسـتفـــزه****** وش ياخذ الباعوض من ريش قرناس